Qe kawb'il k'ub'el tqanil lu at toklen tuk'il WA Notify (Q'ol tqanil WA), aju aplicación in najb'en tu'n Tnam Washington tu'n tetz q'ama'n tqanil kyi'j qeju o che ten tuk'il jun yab'. O kub' b'incha'n WA Notify tu'n onb'il in tzaj tq'o'n Department of Health (DOH, K'loj xjal ke'yil Chwinqlal) toj Tnam Washington.
¿Alkyeqe tqanil in che'x qqanina ex in che ajb'en qu'ne?
Aqeju tqanil lu ate' toj WA Notify:
- Tu'n tku'tz q'i'n ex qa tu'n tjaqet WA Notify.
- Tu'n ttzaj k'amet jun tqanil ti'jju qa o ten jun xjal tuk'il jun yab'.
- Tu'n t-xi samet jun tajlal ex qa jun enlace tu'n tok ke'yit tqanil.
- Tu'n tjax q'et qe tajlal tu'nx tib' in che etz kye qeju sk'o'nmaj qe kyxol at yab'il kyi'j tu'n t-xi kyq'ama'n kye txqantl.
Aju Department of Health (DOH, K'loj xjal ke'yil Chwinqlal) toj Tnam Washington in najb'en tqanil kyi'j yab' tu'n, tu'n tel tnik' ti'j tze'n in naq'unan WA Notify. Aqeju tqanil lu jaku txi q'o'n te DOH, kye qe ja te ke'yil chwinqlal mo kye qeju at toklen kyib'aj ajq'anel. Ax ikx jaku txi q'o'n kye qeju chmol tqanil ex qa kye qeju at kynab'il in kub' kyxnaq'tza'n tqanil. Miti' tb'iya tku'x kyoj tqanil lu nix jatumel in nanq'inaye, ax ikx mlay tz'ajb'en tqanil lu tu'n tel qnik' kyi'j xjal at WA Notify toj kyyolb'il.
O kub' b'incha'n WA Notify tu'n kyok t-xq'uqin qe tqanil kyi'j xjal ikxix in b'ant tu'n Google ex Apple. In che etz junjun tqanil tu'n WA Notify ex mlay tz'el qnik' kyi'j alkyeqe ma che yab'te tu'n tqanil lu:
Qe tajlal mo código tu'nx tib' in che etz
- Aqeju tajlal tu'nx tib' in che etz lu, tu'n Bluetooth in xi sama'n kye qe xjal nqa ate' at WA Notify toj kyyolb'il.
- Qe tajlal tu'nx tib' in che etz in che b'ant tu'n tyolb'ila nya tu'n WA Notify.
- Aqeju tajlal tu'nx tib' in che etz in che ajb'en tu'n tel tnik' WA Notify ex tyolb'ila qa b'alo o tena tuk'il jun xjal at COVID-19 ti'j.
- Aqeju tajlal tu'nx tib' in che etz o'kx in che'x k'u'n kyoj 14 q'ij.
Qe tajlal ex enlace tu'n tok ke'yit tqanil
- Qa ma tz'etz q'ama'n toj prueba qa at COVID-19 ti'je ex qa ma q'ajte jun xjal at toklen kyuk'e ajq'anel ti'ja, tzul tqanin teya qa at WA Notify toj tyolb'ila. Qa ikju, tzul tq'o'n jun tajlal mo enlace tu'n tok ke'yit tqanil tu'n tokxa toj WA Notify.
- Ax ikx in xi tsama'n DOH jun tqanil tz'ib'inmaj toj kyyolb'il xjal o tz'etz q'ama'n toj kyprueba qa at COVID-19 kyi'j ex jun enlace tu'n tok ke'yit, tu'n tetz tqanil tu'n WA Notify tu'n tel kynik' txqantl qa olo che ten tuk'il jun yab' maske miti' in tq'ama'n alkye tb'i.
- Aj tku'x tyaq'ona toj tqanil ex qa toj enlace tu'n tok ke'yit tqanil b'i'x in xi sama'n qe tqanil miti' kyb'i xjal toj, kye qeju at WA Notify toj kyyolb'il tu'n tok kyb'i'n qa b'alo o che ten tuk'il jun yab'.
- In xi tsama'n DOH tqanil kye kykyaqil xjal o tz'etz toj kyprueba qa at COVID-19 kyi'j tu'nju miti' ojtzqi'n qu'n alkyeqe at WA Notify toj kyyolb'il. Qa miti' WA Notify toj tyolb'ila, mi'n tz'ok tq'o'n twi'ya ti'j tqanil.
- Aya jaku jaw jyo'nte qa kb'elex tyaq'ona tqanil mo k'okel tyaq'ona toj enlace tu'n t-xi sama'n tqanil kye qe xjal at WA Notify toj kyyolb'il.
Qe tqanil k'u'nqe ti'j tze'n in che ajb'en
- Ik tze'n in b'aj tuk'il alkyexku juntl aplicación mo temb'il te internet, in xi tk'u'n WA Notify qe tqanil tu'nx tib' in che etz. Kyxol qe tqanil lu ate' junjun in che etz ti'j tyolb'ila. In che ajb'en qe tqanil lu qu'ne tu'n t-xi qb'incha'ne kyi'j nya b'a'n in che tzaj ti'j WA Notify.
- Kyoj qeju tqanil k'u'nqe lu, miti' qe tajlal tu'nx tib' in che etz nix qe enlace tu'n tok ke'yit tqanil, ex mlay tz'el qnik' kyi'j alkye tb'i xjal nix alkye yolb'il in najb'en tu'n.
- Aqeju tqanil lu tu'nx tib' in che jatz naj aj tik' 14 q'ij.
Qe tqanil tu'n kykub' xnaq'tzet
- Qa ma jaw t-sk'o'na mastl tqanil, che xel sama'n ch'in tqanil te DOH tu'n tonin ti'j aplicación.
- Kyxol qe jlu ate' junjun tqanil ti'j tze'n in che ajb'en aplicación. Miti' jun tqanil aju jaku tz'ajb'en tu'n tel qnik'a ti'je.
- Aya jaku jaw jyo'nte tu'n mi'n t-xi samet tqanil lu qa ma ku'x tyaq'ona tu'n tel q'i'n mastl tqanil toj aplicación.
Tu'njo ik o kub' b'incha'n, miti' in xi tk'u'n WA Notify tqanil ti'j jatumel in najliya ex miti' in xi tsama'n tqanil, nix tajlal tu'nx tib' in che etz kye txqantl tu'n tel kynik' ti'ja nix ti'j alkye yolb'il in najb'en tu'ne.
Ti' in b'aj aj t-xi qanit jun tajlal tu'n tok ke'yit tqanil:
Qe xjal at WA Notify toj kyyolb'il ex in tq'ama'n kyprueba b'ant kyu'nx toj kyja qa at COVID-19 kyi'j, tzul tqanin prueba jun tajlal etz tu'n WA Notify tu'n t-xi q'ama'n kye xjal at WA Notify toj kyyolb'il, qa b'alo o che ten tuk'il jun yab' maske mlay tz'ok ojtzqin tb'i yab' kyu'n. Jaku tzaj kyk'amo'n jun tajlal tu'n tok ke'yin tqanil, kyu'n qeju at WA Notify toj kyyolb'il, il ti'j tu'n tku'x kytz'ib'en toj alkye q'ij etz prueba kyi'j ex alkye tajlal kyyolb'il. Aju yolb'il jatumel txi qanit tajlal tu'n tok ke'yit il ti'j tu'n tajb'en ax ikx tu'n tku'x tz'ib'et tajlal, mo tu'n tok yaq'et enlace tu'n t-xi q'amet kye qe txqantl xjal at WA Notify toj kyyolb'il qa b'alo o che ten tuk'il jun yab'.
Tu'n mi'n tetz kab'e tqanil ti'j axju xjal, in xi tk'u'n WA Notify tajlal yolb'il toj ewaj tu'n mi'n tz'el nik'b'aj ti'j, tu'n t-xi qanit tajlal tu'n tok ke'yit tqanil ajxi tik' 90 q'ij. Miti' kyb'i xjal nix jatumel in che anq'in kyoj tqanil lu, nix tu'n tel qnik' kyi'j alkyeqe xjal at WA Notify toj kyyolb'il.
¿Jtoj kxel qsama'ne tqanil ti'ja?
Mlay txi qk'u'ne nix kxel qsama'ne tqanil ti'je kye txqantl, o'kx qa ma ku'x ttz'ib'ina tajlal tu'n tok ke'yit tqanil mo qa ma tz'ok tyaq'ona toj enlace tu'n tok ke'yit. Qa ma b'ant jlu tu'ne, aju WA Notify che xel sama'n qe tajlal tu'nx tib' in che etz kye qe kyyolb'il xjal o che ten nqa ttxlaja. Mlay tz'el qnik'e ti'ja kyu'n qe tqanil lu nix tu'n tajlal tu'nx tib' in che etz, o'kx qa ma tz'ajb'en tyolb'ila tu'n juntl xjal. Ka'yinka 《¿Alkyeqe tqanil in che'x qqanina ex in che ajb'en qu'ne?》 aju tkub' aj t-xi tzyet t-xaq u'j lu tu'n tel tnik'a ti'jju tqanil in najb'en ex in xi k'u'n tu'n WA Notify.
¿Tze'n in nok qxq'uqina tqanil ti'ja?
In najb'en Google ex Tqanil kye qeju Jaku che yab'te te Apple tu'n WA Notify tu'n kyok t-xq'uqin tajlal tu'nx tib' in che etz, ex at mas tqanil ti'jju tu'n kykub' tewit tqanil ex tze'n tu'n t-xi samet. Aju WA Notify miti' in che'x tk'u'n nix in che kub' tb'incha'n qe tajlal tu'nx tib' in che etz, a jlu in b'ant tu'n tyolb'ila.
Aju toklena ti'j tqanil
Mlay b'ant tu'n kyok mojb'et qe tajlal tu'n tok ke'yit tqanil nix qe tqanil etz tu'n yolb'il tuk'iye, mlay b'ant tu'n DOH tu'n tok tojtzqi'n qe tqanil ti'je lu. Tu'ntzunju, mlay b'ant tu'n DOH tu'n ttzaj tq'o'n nix tu'n tel ti'n qe tqanil ti'ja maske kxel tqanina. O'kx aya at toklena ti'j alkye tten in najb'en WA Notify tu'ne. Toj tyolb'ila jaku tz'el ti'ne qe tqanil ti'jju qa o ten jun xjal tu'ke jun yab' ex tu'n mi'n t-xi tk'amo'na tqanil lu juntl maj qa atzun tajb'ila. Akx ikx, jaku tz'el ti'ne WA Notify toj tyolb'ila toj alkyexku amb'il. Qa ma b'ant jlu tu'ne, b'i'x che b'ajel naj kykyaqil tqanil otaq t-xi k'u'n toj yolb'il.